ਅਮਰੀਕਾ ਨਿਵਾਸੀ ਦਿਲਜੀਤ ਦੋਸਾਂਝ ਕਿਵੇਂ ਲੜ ਸਕਦਾ ਹੈ ਚੋਣ ?

ਫੇਰ ਤੋਂ ਚਰਚਾ ਵਿੱਚ ਹੈ ਦਿਲਜੀਤ ਦੋਸਾਂਝ।

ਇੱਕ ਪਾਸੇ ਜਾਗੋ ਪੰਜਾਬ ਮੰਚ ਦਿਲਜੀਤ ਦੋਸਾਂਝ ਨੂੰ ਆਪਣੇ ਮੰਚ ਵਿੱਚ ਸ਼ਾਮਿਲ ਕਰਕੇ ਉਸਨੂੰ ਪੰਜਾਬ ਦੀ ਰਹਿਨੁਮਾਈ ਦੀ ਤਜ਼ਵੀਜ ਪੇਸ਼ ਕਰ ਰਿਹਾ ਹੈ ਤੇ ਦੂਜੇ ਪਾਸੇ ਆਮ ਆਦਮੀ ਪਾਰਟੀ ਇਹ ਕਹਿ ਰਹੀ ਹੈ ਕਿ ਦੋਸਾਂਝ ਦੇ ਮੈਨੇਜਰ ਦੇ ਘਰ ਤੇ ਭਾਜਪਾ ਨੇ ਗੋਲੀਆਂ ਚਲਵਾਈਆਂ ਹਨ ਤਾਂ ਜੋ ਉਸਨੂੰ ਭਾਜਪਾ ਵਿੱਚ ਸ਼ਾਮਿਲ ਹੋਣ ਲਈ ਮਜ਼ਬੂਰ ਕੀਤਾ ਜਾ ਸਕੇ। ਹਾਲਾਂਕਿ ਦੋਸਾਂਝ ਨੇ ਨਾ ਤਾਂ ਭਾਜਪਾ ਲਈ ਹਾਮੀ ਭਰੀ ਹੈ ਤੇ ਨਾ ਹੀ ਜਾਗੋ ਪੰਜਾਬ ਮੰਚ 'ਚ ਸ਼ਾਮਿਲ ਹੋਣ ਲਈ। ਦੋਹਾਂ ਹਾਲਾਤਾਂ ਵਿੱਚ ਉਸਦਾ ਜਵਾਬ ਨਾਂਹ ਹੀ ਹੈ। ਪਰ ਬੁਧਵਾਰ ਨੂੰ ਆਮ ਆਦਮੀ ਪਾਰਟੀ ਨੇ ਇਹ ਕਹਿ ਕੇ ਇਸ ਘਟਨਾ ਨੂੰ ਹੋਰ ਸੰਜੀਦਾ ਬਣਾ ਦਿੱਤਾ ਕਿ ਗੋਲੀਬਾਰੀ ਦੀ ਘਟਨਾ ਦਿਲਜੀਤ ਉੱਤੇ ਭਾਜਪਾ 'ਚ ਸ਼ਾਮਿਲ ਹੋਣ ਲਈ ਦਬਾਅ ਪਾਉਣ ਵਾਸਤੇ ਅੰਜਾਮ ਦਿੱਤੀ ਗਈ ਸੀ। ਇੱਕ ਖ਼ਾਸ ਗੱਲ ਇਹ ਵੀ ਸਾਹਮਣੇ ਆਈ ਹੈ ਕਿ ਦਿਲਜੀਤ ਤਾਂ ਚਿਰੋਕਣਾ ਅਮਰੀਕਾ ਦਾ ਬਾਸ਼ਿੰਦਾ ਹੋ ਚੁਕਾ ਹੈ ਤੇ ਫੇਰ ਉਹ ਪੰਜਾਬ ਵਿੱਚ ਚੋਣਾਂ ਕਿਵੇਂ ਲੜ ਸਕਦਾ ਹੈ ?

ਚੇਤੇ ਰਹੇ ਕਿ ਦਿਲਜੀਤ ਦੋਸਾਂਝ ਦੇ ਮੈਨੇਜਰ ਮੈਨੇਜਰ ਗੁਰਪ੍ਰਤਾਪ ਸਿੰਘ ਕੰਗ ਦੇ ਪਿੰਡ ਗੌਂਡਰ, ਜ਼ਿਲਾ ਕਰਨਾਲ,  ਹਰਿਆਣਾ ਵਿਖੇ ਘਰ 'ਤੇ ਪਿਛਲੇ ਦਿਨੀਂ ਗੋਲੀਬਾਰੀ ਦੀ ਘਟਨਾ ਘਟੀ ਸੀ ਤੇ ਆਮ ਆਦਮੀ ਪਾਰਟੀ ਦੇ ਇੱਕ ਲਿਖਿਤ ਬਿਆਨ ਅਨੁਸਾਰ ਇਸਦੀ ਜਿੰਮੇਵਾਰੀ ਲਾਰੇਂਸ ਬਿਸ਼ਨੋਈ ਗੈਂਗ ਨੇ ਲਈ ਸੀ। ਇੱਕ ਪਾਸੇ ਭਾਜਪਾ ਇਸ ਗੱਲੋਂ ਹੀ ਇਨਕਾਰ ਰਹੀ ਹੈ ਕਿ ਅਜਿਹੀ ਕੋਈ ਘਟਨਾ ਘਟੀ ਵੀ ਸੀ ਤੇ ਦੂਜੇ ਪਾਸੇ "ਆਪ" ਨੇ  ਗਾਇਕ ਵੱਲੋਂ 'ਭਾਜਪਾ'  ਵਿੱਚ ਸ਼ਾਮਲ ਹੋਣ ਦੀ ਪੇਸ਼ਕਸ਼ ਨੂੰ ਠੁਕਰਾਏ ਜਾਣ' ਤੋਂ ਬਾਅਦ ਉਸਨੂੰ ਧਮਕਾਉਣ' ਦਾ ਦੋਸ਼ ਲਗਾਇਆ ਹੈ। ਸੱਤਾਧਾਰੀ ਆਮ ਆਦਮੀ ਪਾਰਟੀ ਨੇ ਇਸ ਘਟਨਾ ਲਈ "ਰਾਜਨੀਤਿਕ ਉਦੇਸ਼ਾਂ" ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ। ਪਾਰਟੀ ਦੇ ਨੇਤਾ, ਇੱਕ ਸੁਰ ਵਿੱਚ ਇਹ ਕਹਿਣ ਲਈ ਤਿਆਰ ਹਨ ਕਿ ਇਹ ਘਟਨਾ ਵਾਪਰੀ ਸੀ ਅਤੇ ਲਾਰੈਂਸ ਬਿਸ਼ਨੋਈ ਗੈਂਗ ਨੇ ਇਸਦੀ ਜ਼ਿੰਮੇਵਾਰੀ ਲਈ ਹੈ।

ਪੰਜਾਬ ਦੇ ਵਿੱਤ ਮੰਤਰੀ ਹਰਪਾਲ ਸਿੰਘ ਚੀਮਾ ਨੇ ਕਿਹਾ, “ਪੰਜਾਬ ਵਿਰੋਧੀ ਭਾਜਪਾ ਮੂਲ ਰੂਪ ਵਿੱਚ ਗੁਜਰਾਤ ਤੋਂ ਇੱਕ ਸੁਰੱਖਿਆ ਰੈਕੇਟ ਚਲਾ ਰਹੀ ਹੈ। ਜਦੋਂ ਦਿਲਜੀਤ ਦੋਸਾਂਝ ਨੇ ਇਹ ਸਪੱਸ਼ਟ ਕਰ ਦਿੱਤਾ ਕਿ ਉਹ ਭਾਜਪਾ ਨਾਲ ਨਹੀਂ ਰਲਣਾ ਚਾਹੁੰਦਾ, ਉਸੇ ਸਮੇਂ ਉਸਦੇ ਮੈਨੇਜਰ ਦੇ ਘਰ ਨੂੰ ਲਾਰੈਂਸ ਬਿਸ਼ਨੋਈ ਗੈਂਗ ਨੇ ਨਿਸ਼ਾਨਾ ਬਣਾਇਆ। ਇਹ ਗੈਂਗ ਬਿਨਾਂ ਕਿਸੇ ਡਰ ਦੇ ਕੰਮ ਕਰਦਾ ਹੈ ਕਿਉਂਕਿ ਭਾਜਪਾ ਬਿਸ਼ਨੋਈ ਨੂੰ ਪੁੱਛਗਿੱਛ ਤੋਂ ਪੂਰੀ ਤਰ੍ਹਾਂ ਆਜ਼ਾਦ ਰੱਖਦੀ ਹੈ,”। ‘ਆਪ’ ਆਗੂਆਂ ਜਿਨ੍ਹਾਂ ਵਿੱਚ ਮੰਤਰੀ ਗੁਰਮੀਤ ਸਿੰਘ ਖੁੱਡੀਆਂ, ਹਰਦੀਪ ਸਿੰਘ ਮੁੰਡੀਆਂ ਅਤੇ ਲਾਲ ਚੰਦ ਕਟਾਰੂਚੱਕ ਸ਼ਾਮਲ ਸਨ, ਨੇ ਇਸ ਦੌਰਾਨ ਕਿਹਾ ਕਿ ਪੰਜਾਬੀਆਂ ਨੂੰ ਡਰਾ ਕੇ ਕਦੇ ਵੀ ਚੁੱਪ ਨਹੀਂ ਕਰਵਾਇਆ ਜਾ ਸਕਦਾ।

‘ਦੋਸਾਂਝ ਦੇ ਭਾਜਪਾ ਵਿੱਚ ਸ਼ਾਮਲ ਹੋਣ ਦਾ ਮੁੱਦਾ ਪਿਛਲੇ ਸ਼ਨੀਵਾਰ ਨੂੰ ਉੱਭਰਿਆ ਸੀ, ਜਦੋਂ ਰਿਟਾਇਰਡ ਆਲ੍ਹਾ  ਅਧਿਕਾਰੀਆਂ, ਫੌਜ ਦੇ ਅਧਿਕਾਰੀਆਂ ਅਤੇ ਉੱਦਮੀਆਂ ਤੇ ਅਧਾਰਿਤ ਇਕ ਨਾਗਰਿਕ ਸਮੂਹ, 'ਜਾਗੋ ਪੰਜਾਬ ਮੰਚ' ਨੇ ਦੋਸਾਂਝ ਨੂੰ ਇੱਕ ਜਨਤਕ ਅਪੀਲ ਕੀਤੀ ਜਿਸ ਵਿੱਚ ਉਸਨੂੰ ਰਾਜ ਵਿੱਚ ਰਾਜਨੀਤਿਕ ਅਗਵਾਈ ਕਰਨ ਲਈ ਸੱਦਾ ਦਿਤਾ ਗਿਆ ਸੀ। ਉਹਨਾਂ ਨੇ ਪੇਸ਼ਕਸ਼ ਦਾ ਜਵਾਬ ਦਿੰਦੇ ਹੋਏ ਕਿਹਾ ਕਿ ਉਹ ਕਦੇ ਵੀ ਰਾਜਨੀਤੀ ਵਿੱਚ ਨਹੀਂ ਆਉਣਗੇ। ਉਹਨਾਂ ਕਿਹਾ ਸੀ, "ਕਦੇ ਵੀ ਨਹੀਂ। ਮੈਂ ਇੱਕ ਮਨੋਰੰਜਨ ਕਰਨ ਵਾਲਾ ਹਾਂ ਅਤੇ ਮੇਰਾ ਕੰਮ ਲੋਕਾਂ ਦਾ ਮਨੋਰੰਜਨ ਕਰਨਾ ਹੈ। ਮੈਂ ਆਪਣੇ ਖੇਤਰ ਵਿੱਚ ਬਹੁਤ ਖੁਸ਼ ਹਾਂ,"।

ਹੁਣ ਇੱਕ ਨਵੀਂ ਚਰਚਾ ਇਹ ਛਿੜ ਗਈ ਹੈ ਕਿ ਦਿਲਜੀਤ ਦੋਸਾਂਝ ਤਾਂ ਅਮਰੀਕਾ ਦਾ ਨਿਵਾਸੀ ਹੈ ਇਸ ਲਈ ਉਹ ਪੰਜਾਬ ਵਿੱਚ ਚੋਣਾਂ ਕਿਵੇਂ ਲੜ ਸਕਦਾ ਹੈ। ਉਸਨੇ 2022 ਵਿੱਚ ਅਮਰੀਕੀ ਨਾਗਰਿਕਤਾ ਪ੍ਰਾਪਤ ਕਰ ਲਈ ਸੀ ਅਤੇ ਉਸੇ ਸਾਲ ਸਤੰਬਰ ਤੋਂ ਅਮਰੀਕੀ ਪਾਸਪੋਰਟ 'ਤੇ ਲਗਾਤਾਰ ਭਾਰਤ ਦੀ ਯਾਤਰਾ ਕਰ ਰਿਹਾ ਹੈ। ਹੁਣ ਉਸ ਕੋਲ ਭਾਰਤੀ ਨਾਗਰਿਕਤਾ ਨਹੀਂ ਹੈ ਅਤੇ ਉਹ ਸਤੰਬਰ 2022 ਤੋਂ ਈ-ਵੀਜ਼ਾ 'ਤੇ ਭਾਰਤ ਵਿੱਚ ਦਾਖਲ ਹੋ ਰਿਹਾ ਹੈ। ਇਸ ਜਾਣਕਾਰੀ ਤੇ ਟਿੱਪਣੀ ਕਰਦੇ ਹੋਏ ਜਾਗੋ ਪੰਜਾਬ ਮੰਚ ਦੇ ਪ੍ਰਧਾਨ ਰਿਟਾਇਰਡ ਬ੍ਰਿਗੇਡੀਅਰ ਹਰਵੰਤ ਸਿੰਘ ਨੇ ਕਿਹਾ, "ਅਸੀਂ ਦੋਸਾਂਝ ਨੂੰ ਚੋਣਾਂ ਨਹੀਂ ਲੜਵਾਉਣੀਆਂ, ਅਸੀਂ ਉਸਨੂੰ ਇੱਕ ਯੂਥ ਆਈਕਾਨ ਦੇ ਰੂਪ ਵਿੱਚ ਅੱਗੇ ਲਿਆਉਣਾ ਚਾਹੁੰਦੇ ਹਾਂ, ਅਸੀਂ ਚਾਹੁੰਦੇ ਹਾਂ ਕਿ ਉਹ ਨੌਜਵਾਨ ਪੀੜ੍ਹੀ ਦੇ ਲਈ ਸਿਰਫ ਰੋਜ਼ਗਾਰ ਹੀ ਪੈਦਾ ਨਾ ਕਰੇ ਬਲਕਿ ਬੇਰੋਜ਼ਗਾਰਾਂ ਨੂੰ ਅਜਿਹਾ ਹਲੂਣਾ ਦੇਵੇ ਕਿ ਉਹ ਖੁਦ ਦੂਜਿਆਂ ਲਈ ਰੋਜ਼ਗਾਰ ਪੈਦਾ ਕਰਨ, ਅਸੀਂ ਉਸ ਵਿੱਚ ਨੌਜਵਾਨਾਂ ਦਾ ਸੁਨਹਿਰਾ ਭਵਿੱਖ ਵੇਖਦੇ ਹਾਂ।"

ਅਮਰਜੀਤ ਸਿੰਘ, ਚੰਡੀਗੜ੍ਹ

ਮੋਬਾਇਲ : 98728 80108